“HOPE Hurricane Relief Benefit”

San Nicolas, ARUBA – Diasabra ultimo HopeAruba Movement hunto cu e grupo “St. Maarteners Living in Aruba” a tene nan “HOPE Hurricane Relief Benefit,” pa asina sostene islanan ruman cu a sufri daño pa motibo di Horcan Irma. Esaki a tuma luga na YMCA San Nicolas for di 9or di mainta pa 5or di atardi a trece un sosten masal for di tur parti di Aruba.

Como un di e balornan cu e organisacion ta para pe ta transparencia, directiva ta desea di comparti e resumen di montante y articulonan ricibi como resultado di e iniciativa.

Cuminda y awa E sosten massal ricibi di pueblo a logra un total di 602 pakete di cuminda y awa cu a wordo entrega na Rode Kruis Aruba pa manda den container 29 di September. HopeAruba tambe tin contacto estrecho cu miembronan di e directiva di Rode Kruis St. Maarten kende nan a ricibi e cargacion y lo percura pa e distribucion tuma lugar pa esnan mas vulnerabel riba e isla.

Placa efectivo

Den placa efectivo hunto cu benta di bebida a ricibi un suma total di Awg 4030.00. Kitando gasto di bebida y material di pakete Awg 1040.61 a keda un suma di Awg 2989.39

Pa loke ta paña ricibi, esakinan ta cla pa sali den container. E costo di e container lo wordo cubri cu e donacionan cu HopeAruba a ricibi den efectivo.

HopeAruba ta un plataforma colaborativo pa sinergia civico di cual su abreviacion - H.O.P.E. - ta para pa e palabranan: Honor, Oportunidad, Productividad y Excelencia. E ta trata di ciudadanonan honorabel cu ta haci uzo di cada oportunidad pa haci bon y cu ta productivo pa bienestar di otronan, nos comunidad, nos nacion y cu ta haci esaki cu excelencia.

Esaki ta keda representa tambe den tur su iniciativanan pa combati retonan social di nos pais, manera nan trabou comunitario semanal pa duna speransa y alimenta adictonan ambulante, realisacion di e prome centro di rehabilitacion - Cas Speransa Nobo, e fundamento di Goshen Sustainable Development, un projecto agricultural organico, netamente Arubiano, pa sostenibilidad pa iniciativanan social y oportunidad pa labor vocacional na esnan superando un bida di adicto na substancia, como tambe, e ultimo iniciativa social regional di e ‘HOPE Hurricane Relief Benefit’ pa duna un man na nos islanan ruman cu a sufri daño di horcan.

E Team di HopeAruba ta expresa un “danki” profundo na tur medionan di prensa, instancia, institucion, organisacion y persona cu a contribui den cualquier forma na a causa di HOPE Hurricane Relief Benefit. E evento aki a demonstra loke HopeAruba Movemento ta kere – cu den union tin poder.